ایرانی بحریہ کا آبنائے ہرمز کے داخلی راستے پر امریکی بغیر پائلٹ آبدوز پکڑنے کا دعویٰ

ایرانی مسلح افواج اور پاسدارانِ انقلاب (IRGC) نے خلیجِ فارس میں ابنائے ہرمز کے انتہائی حساس اور اسٹریٹجک داخلی راستے پر امریکی بحریہ کی جدید ترین خودکار غیر پائلٹ آبدوز (انڈر واٹر ڈرون) کو کامیابی سے پکڑنے اور اپنے قبضے میں لینے کا بڑا دعویٰ کیا ہے۔ ایرانی سرکاری ذرائع ابلاغ کے مطابق، پاسدارانِ انقلاب کی سمندری فورسز نے ایک انتہائی پیچیدہ آپریشنل اور انٹیلی جنس کارروائی کے ذریعے امریکی فوج کی ‘ڈائیو ایل ڈی’ (Dive-LD) ماڈل کی حامل اس ڈرون آبدوز کو گھیرے میں لے کر قبضے میں لیا اور بعد ازاں اسے بحفاظت ایرانی ساحل پر منتقل کر دیا۔

ایرانی فوجی ذرائع اور ذرائع ابلاغ کی فراہم کردہ تفصیلات کے مطابق، ضبط کی جانے والی یہ امریکی زیرِ آب ڈرون 2025ء میں امریکی بحری بیڑے میں شامل کی گئی تھی۔ 5 اعشاریہ 8 میٹر طویل اور تقریباً 3 ٹن وزنی یہ آبدوز گہرے سمندر میں طویل دورانیے کے انٹیلی جنس، نگرانی، سمندری نقشہ سازی، مائن ڈٹیکشن اور زیرِ آب کیبلز کے معائنے جیسے اہم مشنز کے لیے تیار کی گئی ہے، جو مسلسل 10 دن تک زیرِ آب رہتے ہوئے 6 ہزار میٹر کی گہرائی تک کام کرنے کی صلاحیت رکھتی ہے۔ ایرانی حکام نے اس کارروائی کو ایک بڑی فوجی و انٹیلی جنس کامیابی قرار دیتے ہوئے جلد اس ڈرون آبدوز کی تصویری اور تصویری ثبوت جاری کرنے کا اعلان کیا ہے۔