حوثیوں کے سعودیہ پر حملوں میں واضح ایرانی ہاتھ نظر آتا ہے: امریکی وزیر خارجہ

امریکی وزیرِ خارجہ مارکو روبیو نے یمن کے حوثی باغیوں کو صریحاً ایران کا ایجنٹ اور پراکسی قرار دیتے ہوئے کہا ہے کہ خطے میں حوثیوں کی سیکیورٹی مخالف سرگرمیوں اور بالخصوص سعودی عرب پر ہونے والے حالیہ حملوں میں واضح طور پر ایرانی ہاتھ نظر آتا ہے۔ واشنگٹن میں ذرائع ابلاغ کے نمائندوں سے بات کرتے ہوئے امریکی وزیرِ خارجہ نے زور دیا کہ امریکہ اور سعودی عرب کے درمیان تاریخی اور انتہائی مضبوط دفاعی و سیکیورٹی تعلقات قائم ہیں، اور واشنگٹن اپنے اہم علاقائی اتحادی کی سلامتی پر کسی قسم کا سمجھوتہ نہیں کرے گا۔

مارکو روبیو نے مزید کہا کہ امریکی انتظامیہ اور پینٹاگون خطے میں پیش آنے والے تمام تر عسکری واقعات اور زمینی صورتحال پر گہری نظر رکھے ہوئے ہیں۔ ان کا کہنا تھا کہ یمن کی قانونی اور بین الاقوامی سطح پر تسلیم شدہ حکومتی فورسز خطے میں حوثیوں کی عسکری پیش قدمی اور اثر و رسوخ کو روکنے کے لیے بھرپور کوششیں کر رہی ہیں اور امریکہ ان کی سیکیورٹی صورتحال کا باریک بینی سے جائزہ لے رہا ہے۔