ایرانی جوہری تنصیبات تک آئی اے ای اے کو رسائی کے مثبت اثرات ہونگے: رافیل گروسی

بین الاقوامی جوہری توانائی ایجنسی (IAEA) کے سربراہ رافیل گروسی نے واضح کیا ہے کہ ایران سے سنجیدہ مذاکرات اور اس کی اہم جوہری تنصیبات تک ایجنسی کے انسپکٹرز کو رسائی دینا ہی تنازع کے حل کا سب سے مختصر اور مؤثر ترین راستہ ہے۔ انہوں نے بتایا کہ جون 2025 میں عسکری حملوں سے قبل ایران کے پاس 60 فیصد تک افزودہ 440 کلوگرام یورینیم کا ذخیرہ موجود تھا، تاہم ان حملوں کے بعد ایران کے موجودہ افزودہ یورینیم کے ذخیرے کی حتمی صورتِ حال تاحال واضح نہیں ہے۔ رافیل گروسی نے انکشاف کیا کہ امریکہ، برطانیہ، فرانس اور جرمنی (E3) نے ایران کے خلاف ایک سخت قرارداد کا مسودہ تیار کر لیا ہے اور ایران کی جانب سے ضروری جوہری معلومات فراہم نہ کرنے کا معاملہ اقوامِ متحدہ کی سلامتی کونسل میں لے جانے کی تیاریاں کی جا رہی ہیں، جس پر رواں ہفتے ہی ووٹنگ متوقع ہے۔

دوسری جانب، ایران نے مغربی ممالک کی اس مجوزہ قرارداد کو انتہائی مایوس کن اور معاندانہ اقدام قرار دے کر مکمل طور پر مسترد کر دیا ہے اور موجودہ حالات میں جوہری تنصیبات کے یکطرفہ معائنے کا مطالبہ بھی نامنظور کر دیا ہے۔ تہران نے آئی اے ای اے کے سربراہ رافیل گروسی سے مطالبہ کیا ہے کہ وہ معائنے کی ضدی اپیلوں سے پہلے امریکہ اور اسرائیل کو پرامن ایرانی جوہری تنصیبات پر حملوں اور حملوں کی دھمکیوں سے روکنے کے لیے اپنا اثر و رسوخ استعمال کریں۔ ایرانی حکام نے واضح کیا کہ جنگی کارروائیوں سے متاثرہ جوہری سائٹس کے جائزے کے لیے موجودہ عسکری صورتِ حال کو مدِنظر رکھتے ہوئے ایک نیا طریقہ کار اور حفاظتی فریم ورک تشکیل دینا ناگزیر ہے۔