شمالی کوریا کا نیا جنگی بحری جہاز کو جوہری جوابی کارروائی کا حصہ بنانے کا اعلان

شمالی کوریا کے سربراہ کم جونگ ان نے اعلان کیا ہے کہ ان کے ملک کا نیا جنگی بحری جہاز قومی جوہری جوابی کارروائی کے نظام کا حصہ ہوگا اور دشمن کے کسی بھی اقدام کے خلاف تباہ کن حملہ کرنے کی مکمل صلاحیت رکھتا ہے۔ شمالی کوریا کے سرکاری ذرائع ابلاغ کے مطابق کم جونگ ان نے یہ اہم باتیں مشرقی ساحلی شہر وونسان میں ایک نئے گائیڈڈ میزائل ڈسٹرائر کی بحری بیڑے میں باضابطہ شمولیت کی تقریب سے خطاب کرتے ہوئے کہیں۔ انہوں نے کہا کہ جزیرہ نما کوریا کے مشرقی سمندر میں اس جدید بحری جہاز کی تعیناتی شمالی کوریا کے مخالفین کے لیے ایک واضح اور سخت پیغام ہے، اور اب وقت آ گیا ہے کہ تہران کی طرح پیانگ یانگ بھی سمندر کی سطح اور زیرِ آب اپنی کامل خودمختاری کا عملی مظاہرہ کرے۔

شمالی کوریا کے عسکری حکام کے مطابق ‘کانگ کون’ (Kang Kon) نامی یہ نیا ڈسٹرائر 5 ہزار ٹن وزنی ہے اور اس نوعیت کا بحری بیڑے میں شامل ہونے والا یہ دوسرا جدید جنگی جہاز ہے۔ اس سے محض 3 ماہ قبل ‘چوئے ہون’ (Choe Hyon) نامی ایسا ہی ایک اور گائیڈڈ میزائل ڈسٹرائر بھی قومی بحریہ کا حصہ بنایا گیا تھا۔ ماہرین کا کہنا ہے کہ شمالی کوریا کی جانب سے اپنے بحری بیڑے میں اتنی تیز رفتاری کے ساتھ جدید جوہری صلاحیت کے حامل جہازوں کی شمولیت خطے میں طاقت کے توازن کو تبدیل کرنے اور بحری حکمتِ عملی کو مزید جارحانہ بنانے کی ایک واضح کوشش ہے