جنگ نہیں چاہتے، جارحیت پر خاموش بھی نہیں بیٹھیں گے: ایرانی صدر

تہران/بشکیک: ایرانی صدر ڈاکٹر مسعود پزشکیان نے واضح الفاظ میں کہا ہے کہ ایران جنگ کی تلاش میں نہیں ہے، تاہم کسی بھی قسم کی جارحیت کے سامنے تہران خاموش نہیں بیٹھے گا اور ہر حملے کا بھرپور و فیصلہ کن جواب دیا جائے گا۔

ترکیہ کی خبر ایجنسی ‘انادولو’ کے مطابق ایرانی صدر کا یہ ردِعمل ایران کے لارک جزیرے (Lark Island) پر امریکی افواج کے حملے کے بعد سامنے آیا ہے۔ شنگھائی تعاون تنظیم (SCO) کے سربراہی اجلاس میں شرکت کے لیے کرغزستان کے دارالحکومت بشکیک روانہ ہونے سے قبل میڈیا سے گفتگو کرتے ہوئے مسعود پزشکیان نے متنبہ کیا کہ خطے میں عدم استحکام اور بدامنی کسی کے مفاد میں نہیں اور یہ تمام ممالک کے لیے سنگین مشکلات کا باعث بنے گی۔ ان کا کہنا تھا کہ دنیا کی کوئی طاقت ایرانی قوم کو ہتھیار ڈالنے پر مجبور نہیں کر سکتی، خطے اور دنیا میں امن کا قیام ہماری ترجیح ہے۔

دورے سے قبل میڈیا سے بات کرتے ہوئے ایرانی صدر نے اقتصادی پابندیوں کے اثرات سے انکار کرنے والے عناصر پر طنز کرتے ہوئے انکشاف کیا کہ بین الاقوامی پابندیوں کی وجہ سے ایرانی برآمدات میں 25 سے 35 فیصد تک کی کمی واقع ہوئی ہے۔ انہوں نے زور دیا کہ عالمی برادری کو خطے کی موجودہ صورتحال کی سنگینی کو سمجھنا ہوگا کیونکہ عدم استحکام کا اثر سرحدوں تک محدود نہیں رہے گا۔