دادو کے کچے علاقے میں دو گروہوں میں فائرنگ کا تبادلہ، 8 افراد ہلاک

دادو: ضلع دادو کے کچے کے علاقے گوٹھ دانو چانڈیو میں زمین اور راستے کے تنازع پر دو برادریوں کے درمیان فائرنگ کے شدید تبادلے کے نتیجے میں 8 افراد جاں بحق جبکہ 3 زخمی ہو گئے ہیں۔

پولیس ذرائع کے مطابق واقعہ گوٹھ دانو چانڈیو میں پیش آیا جہاں دونوں برادریوں کے درمیان زرعی زمین پر راستہ نکالنے کے معاملے پر تلخ کلامی ہوئی۔ بات بڑھنے پر دونوں جانب سے جدید ہتھیاروں سے ایک دوسرے پر اندھا دھند فائرنگ کی گئی۔ فائرنگ کی زد میں آ کر 8 افراد موقع پر ہی جاں بحق ہو گئے جبکہ عورتوں اور بچوں سمیت 3 افراد شدید زخمی ہوئے۔ اطلاع ملتے ہی پولیس کی بھاری نفری نے علاقے کو گھیرے میں لے کر لاشوں اور زخمیوں کو قریبی ہسپتال منتقل کیا۔

دوسری جانب وزیراعلیٰ سندھ مراد علی شاہ نے گوٹھ دانو چانڈیو میں فائرنگ کے اس دلخراش واقعے کا فوری نوٹس لیتے ہوئے قیمتی انسانی جانوں کے ضیاع پر گہرے دُکھ اور لواحقین سے دلی ہمدردی کا اظہار کیا ہے۔ وزیراعلیٰ سندھ نے انسپکٹر جنرل (آئی جی) پولیس سندھ سے واقعے کی تفصیلی رپورٹ طلب کر لی ہے اور ملزمان کو فوری گرفتار کر کے قانون کے کٹہرے میں لانے کی ہدایت کی ہے۔ مراد علی شاہ نے واضح کیا کہ کسی کو بھی قانون ہاتھ میں لینے اور معصوم جانوں سے کھیلنے کی اجازت نہیں دی جائے گی۔