کال سینٹر کے ذریعے غیر اخلاقی مواد کی فروخت: ایف آئی اے نے مزید 20 چینی شہریوں کو پاکستان بدر کر دیا

اسلام آباد: کال سینٹر کے ذریعے غیر اخلاقی مواد کی فروخت اور ویزہ پالیسی کی سنگین خلاف ورزی میں ملوث مزید 20 غیر ملکیوں کو پاکستان سے ڈی پورٹ کر دیا گیا ہے۔

ایف آئی اے (FIA) کے ذرائع کے مطابق کارروائی کے دوران مزید 20 چینی شہریوں کو پاکستان بدر کر کے ان کے نام پاسپورٹ کی بلیک لسٹ میں شامل کر دیے گئے ہیں تاکہ وہ مستقبل میں دوبارہ پاکستان نہ آ سکیں۔ ان تمام چینی شہریوں کو سپارکو پلازہ (SPARCO Plaza) میں قائم ایک غیر قانونی کال سینٹر پر چھاپے کے دوران گرفتار کیا گیا تھا، جہاں سے وہ آن لائن سائبر جرم اور غیر اخلاقی مواد کی فروخت میں ملوث پائے گئے تھے۔

حکام کے مطابق گرفتار کیے گئے تمام غیر ملکی بزنس یا وزٹ ویزے پر پاکستان آئے تھے اور انہوں نے ویزہ قوانین اور این او سی کی صریحاً خلاف ورزی کی تھی۔ واضح رہے کہ اس سے قبل اسی نیٹ ورک کے خلاف کارروائی کرتے ہوئے 14 ویتنامی شہریوں کو بھی ڈی پورٹ کر کے واپس ان کے ملک بھیجا جا چکا ہے، جبکہ ایف آئی اے ملک بھر میں غیر قانونی کال سینٹرز کے خلاف کریک ڈاؤن جاری رکھے ہوئے ہے۔