چین کی معروف کمپنی کا پنجاب کے آئی ٹی سیکٹر میں اظہار دلچسپی

بیجنگ/لاہور: وزیراعلیٰ پنجاب مریم نواز شریف نے اپنے دورہٴ چین کے دوران چین کی ایک معروف ٹیک کمپنی کے اعلیٰ سطحی وفد سے اہم ملاقات کی، جس میں چینی کمپنی نے پنجاب کے شعبہ آئی ٹی (IT) اور ڈیجیٹل انفراسٹرکچر میں گہری دلچسپی کا اظہار کیا ہے۔

ملاقات کے دوران زراعت، ہیلتھ کیئر، سماجی و اقتصادی پروگرامز اور موسمیاتی پیشگوئی (Climate Forecast) میں آرٹیفیشل انٹیلی جنس (AI) کے استعمال پر تفصیلی تبادلہ خیال کیا گیا۔ اس موقع پر پبلک سروسز کو جدید بنانے کے لیے اے آئی سٹریٹجک پارٹنرشپ قائم کرنے کے امور پر بھی غور کیا گیا۔ وزیراعلیٰ مریم نواز نے کہا کہ پنجاب میں گورننس کے پورے نظام کو آرٹیفیشل انٹیلی جنس سے مربوط کیا جا رہا ہے اور حکومت کل کی بجائے آج ہی جدید ٹیکنالوجی کو اپنانے کی پالیسی پر عمل پیرا ہے۔

وزیراعلیٰ نے بتایا کہ پنجاب میں دنیا کا سب سے بڑا پبلک سیکٹر کینسر ہسپتال قائم کیا جا رہا ہے، جبکہ پنجاب آرٹیفیشل انٹیلی جنس کی باقاعدہ تشکیل کرنے والا ملک کا پہلا صوبہ بن چکا ہے۔ انہوں نے انکشاف کیا کہ سرکاری اسکولوں میں بچوں کو اے آئی کا نصاب پڑھانے کا خیال انہیں بیجنگ کے طلبہ کو دیکھ کر آیا۔ انہوں نے کہا کہ پنجاب میں نہ صرف افسران بلکہ کابینہ ارکان کو بھی اے آئی کی تربیت دی گئی ہے۔ ملاقات میں اوورسیز پاکستانیوں اور سمال اینڈ میڈیم انٹرپرائزز (SMEs) کے امور پر بھی بات چیت کی گئی۔