ریاست امن و امان برقرار رکھنے کی اپنی ذمہ داری پوری کرے گی: محسن نقوی

وفاقی وزیرِ داخلہ محسن نقوی نے فیڈرل کانسٹیبلری (ایف سی) ٹریننگ سینٹر شب قدر، چارسدہ کا دورہ کیا اور اینٹی رائٹ ونگ کی خصوصی تربیتی مشقوں کا معائنہ کیا۔ اس موقع پر انہوں نے اہلکاروں کی پیشہ ورانہ صلاحیتوں، آپریشنل تیاریوں اور ہجوم کو کنٹرول کرنے کی مہارت کو سراہا۔ اپنے خطاب میں وزیرِ داخلہ نے واضح کیا کہ پرامن احتجاج سب کا حق ہے لیکن قانون ہاتھ میں لینے، تشدد کرنے یا املاک کو نقصان پہنچانے کی اجازت نہیں دی جائے گی اور ریاست امن و امان قائم رکھنے کے لیے سختی سے نمٹے گی۔ انہوں نے جوانوں کے لیے جدید پروٹیکشن گیئر، گیس ماسکس اور ایف سی ہیڈکوارٹر میں عالمی معیار کے سوئمنگ پول سمیت کھیلوں کی سہولیات کا اعلان بھی کیا۔ بریفنگ میں بتایا گیا کہ زیرِ تربیت اہلکاروں میں تمام صوبوں، آزاد کشمیر اور گلگت بلتستان سمیت پہلی مرتبہ 35 خواتین بھی شامل ہیں۔