پشاور میں سی ٹی ڈی کی کارروائی، 4 مبینہ دہشت گرد ہلاک

کاؤنٹر ٹیررازم ڈیپارٹمنٹ (سی ٹی ڈی) پشاور ریجن نے میرا کچوڑی کے علاقے قبرستان مہر گل کلے میں انٹیلی جنس معلومات پر مبنی ایک کامیاب کارروائی کرتے ہوئے 4 مبینہ دہشت گردوں کو ہلاک کر دیا ہے۔ سی ٹی ڈی کے مطابق ہلاک ہونے والے دہشت گردوں کے قبضے سے 3 کلاشنکوفیں، ایک پستول، ہینڈ گرینیڈ، 7 میگزین اور متعدد کارتوس برآمد ہوئے ہیں۔ ہلاک دہشت گردوں میں سے ایک کی شناخت ننگرہار (افغانستان) کے رہائشی سید ولی ولد عبدالغنی کے نام سے ہوئی ہے جس سے افغان مہاجر کارڈ بھی برآمد ہوا ہے۔ حکام کا کہنا ہے کہ سید ولی ممکنہ طور پر ان 3 افغان خودکش حملہ آوروں میں شامل تھا جو حال ہی میں پاکستان میں دہشت گردی کی نیت سے داخل ہوئے تھے، تاہم مزید تحقیقات جاری ہیں۔ سی ٹی ڈی نے بتایا کہ کارروائی کے دوران فرار ہونے والے دیگر ملزمان کی گرفتاری کے لیے علاقے کو گھیرے میں لے کر سرچ آپریشن شروع کر دیا گیا ہے