آزاد کشمیر میں کلیئرنس آپریشن کے دوران فائرنگ، رینجرز اہلکار شہید

سرساوہ: سرساوہ تا تراڑ کھل سڑک کی کلیئرنس آپریشن کے دوران مسلح افراد کی فائرنگ سے پاکستان رینجرز کا ایک اہلکار شہید جبکہ دوسرا شدید زخمی ہو گیا۔

تفصیلات کے مطابق علاقے میں آمد و رفت میں درپیش مشکلات اور غذائی قلت کے باعث مقامی آبادی کے پرزور مطالبے پر بند راستے کھولنے کے لیے کلیئرنس آپریشن جاری تھا۔ اس دوران سڑک کو عام نقل و حرکت کے لیے بحال کرنے میں مصروف قانون نافذ کرنے والے اداروں کے اہلکاروں پر مسلح سنئپرز نے گھات لگا کر فائرنگ کر دی۔

فائرنگ کے نتیجے میں رینجرز کے سپاہی شاہ نواز سینے پر گولی لگنے سے موقع پر ہی جامِ شہادت نوش کر گئے، جبکہ لانس نائیک بلال کاندھے پر گولی لگنے سے شدید زخمی ہوئے جنہیں فوری طبی امداد کے لیے منتقل کر دیا گیا۔ رپورٹ کے مطابق شہید سپاہی شاہ نواز کا تعلق سندھ کے ضلع خیرپور سے تھا۔

دفاعی ماہرین کا کہنا ہے کہ سیکیورٹی اہلکاروں پر جدید اسلحے اور بارودی مواد سے حملہ کرنا باقاعدہ منصوبہ بندی کا حصہ ہے، جبکہ ریاستی رٹ کے قیام اور عوامی تحفظ کے لیے سیکیورٹی فورسز کی قربانیاں لائقِ تحسین ہیں۔ واقعے کے بعد قانون نافذ کرنے والے اداروں نے ملوث مسلح عناصر کے خلاف سخت اور بلاامتیاز کارروائی کا آغاز کر دیا ہے۔