ڈی جی پی ڈی ایم اے کا ایمرجنسی سروسز اکیڈمی اور ہیڈکوارٹرز کا دورہ

وزیراعلیٰ پنجاب مریم نواز شریف کی واضح ہدایات کی روشنی میں ممکنہ طوفانی بارشوں، اربن فلڈنگ اور سیلابی صورتحال سے نمٹنے کے لیے صوبے بھر کے تمام متعلقہ محکموں کو ہائی الرٹ کر دیا گیا ہے۔ اس سلسلے میں ڈی جی پی ڈی ایم اے (PDMA) سیف انور جپہ نے ایمرجنسی سروسز اکیڈمی اور ہیڈکوارٹرز کا دورہ کیا، جہاں سیکرٹری ایمرجنسی سروسز ڈاکٹر رضوان نصیر نے انہیں ڈیزاسٹر مینجمنٹ کی حکمتِ عملی اور ریسکیو 1122 کی تیاریوں پر تفصیلی بریفنگ دی۔

دورے کے دوران جدید واٹر ریسکیو بوٹس، لائف جیکٹس، ڈی واٹرنگ پمپس اور ریسکیو گاڑیوں کی دستیابی کا معائنہ کیا گیا، جبکہ پی ڈی ایم اے اور ریسکیو 1122 کے درمیان مشترکہ کنٹرول روم کے نظام اور ڈیٹا شیئرنگ کو مزید فعال بنانے پر اتفاق ہوا۔ ڈی جی پی ڈی ایم اے سیف انور جپہ نے تمام اضلاع کو پیشگی الرٹس جاری کرنے کی تصدیق کرتے ہوئے بتایا کہ وزیراعلیٰ کی ہدایت پر پنجاب بھر میں فلڈ مانیٹرنگ سیل 24 گھنٹے فعال ہے اور دریاؤں و ڈیمز کی سطح پر مسلسل نظر رکھی جا رہی ہے۔ انہوں نے واضح کیا کہ عوامی تحفظ حکومت کی اولین ترجیح ہے اور ہنگامی صورتحال میں رسپانس ٹائم کو کم سے کم رکھتے ہوئے کسی بھی قسم کی غفلت برداشت نہیں کی جائے گی۔