دریائے سندھ میں چشمہ اور جناح بیراج پر دوبارہ نچلے درجے کا سیلاب

حالیہ بارشوں کے بعد دریائے سندھ میں پانی کی سطح میں ایک بار پھر اضافے کے باعث چشمہ بیراج اور جناح بیراج کے مقام پر نچلے درجے کا سیلاب ریکارڈ کیا گیا ہے۔ ذرائع کے مطابق چشمہ بیراج پر پانی کی آمد 2 لاکھ 65 ہزار 200 کیوسک اور اخراج 2 لاکھ 60 ہزار 100 کیوسک ریکارڈ کیا گیا ہے، جہاں پانی کی سطح 647 فٹ تک پہنچ گئی ہے۔ دوسری جانب جناح بیراج پر بھی سیلابی صورتحال برقرار ہے، جہاں پانی کی آمد 2 لاکھ 99 ہزار 600 کیوسک جبکہ اخراج بڑھ کر 2 لاکھ 95 ہزار کیوسک ہو گیا ہے۔ دونوں اہم بیراجوں پر پانی کے مسلسل بہاؤ اور آمد سے دریائے سندھ میں سیلابی کیفیت دیکھنے میں آ رہی ہے۔