پاکستان نے سندھ طاس معاہدے کی معطلی کا معاملہ دوبارہ عالمی فورم پر اٹھا دیا، بھارتی اقدام اشتعال انگیز قرار

نائب وزیراعظم اور وزیر خارجہ اسحاق ڈار نے فلپائن کے دارالحکومت منیلا میں منعقدہ 33 ویں ‘آسیان ریجنل فورم’ (ARF) کے اجلاس سے خطاب کرتے ہوئے بھارت کی جانب سے سندھ طاس معاہدے کی یکطرفہ معطلی کو شدید تشویشناک اور اشتعال انگیز اقدام قرار دیا ہے۔ انہوں نے خبردار کیا کہ پانی جیسے اہم وسائل کو بطور ہتھیار استعمال کرنا عالمی قوانین کی خلاف ورزی ہے، جس کے اثرات 25 کروڑ پاکستانیوں کی زندگی اور روزگار پر براہِ راست پڑ سکتے ہیں۔

اسحاق ڈار نے زور دے کر کہا کہ مقبوضہ جموں و کشمیر کے تنازع کا اقوام متحدہ کی قراردادوں کے مطابق منصفانہ اور پائیدار حل ہی جنوبی ایشیا میں حقیقی امن و استحکام کی بنیادی ضامن ہے۔ انہوں نے واضح کیا کہ پانی کی منصفانہ تقسیم کا ضامن یہ معاہدہ خطے میں پائیدار تعلقات کے لیے بے حد ضروری ہے، اور اس جیسے سنجیدہ معاملات پر عالمی برادری اور آسیان فورم کو اپنا کردار ادا کرنا چاہیے۔

نائب وزیراعظم نے مزید کہا کہ خطے میں پائیدار امن کی بنیاد کے لیے تمام فریقین کو تحمل کا مظاہرہ کرنا ہوگا اور سفارت کاری و مذاکرات کا راستہ اپنانا چاہیے۔ افغان صورتحال پر گفتگو کرتے ہوئے ان کا کہنا تھا کہ افغانستان کی سرزمین کو کسی بھی صورت میں پاکستان کے خلاف دہشت گردی یا تخریب کاری کے لیے استعمال کرنے کی اجازت نہیں ہونی چاہیے۔