دشمن باضابطہ طور پر جنگ میں داخل ہوچکا، اب کوئی مفاہمتی یادداشت مؤثر نہیں رہی: ابراہیم رضائی

ایرانی پارلیمنٹ کی قومی سلامتی کمیٹی کے ترجمان ابراہیم رضائی نے علاقائی صورتحال پر اہم موقف اختیار کرتے ہوئے کہا ہے کہ خطے میں کشیدگی کے حالیہ اضافے کے بعد اب کوئی بھی مفاہمتی یادداشت مؤثر نہیں رہی۔ انہوں نے دوٹوک الفاظ میں کہا کہ دشمن باضابطہ طور پر جنگ میں داخل ہو چکا ہے اور اس نے مفاہمتی یادداشتوں کی تمام تر شقوں کی خلاف ورزی کی ہے۔ ابراہیم رضائی نے انکشاف کیا کہ موجودہ صورتحال کے پیش نظر ایرانی پارلیمنٹ میں آبنائے ہرمز کی سلامتی اور پائیدار ترقی سے متعلق ایک جامع منصوبہ پیش کیا گیا تھا، جبکہ اس اہم ترین بحری گزرگاہ کے حوالے سے اسٹریٹجک ایکشن پلان کی پارلیمنٹ سے باقاعدہ منظوری بھی دے دی گئی ہے۔ ترجمان کا مزید کہنا تھا کہ موجودہ علاقائی چیلنجز کے پیش نظر ایران اپنی قومی سلامتی اور اسٹریٹجک سمندری راستوں کے تحفظ کے لیے ہر ممکنہ اور ضروری اقدامات اٹھا رہا ہے۔