روم میں اسرائیل اور لبنان کے درمیان امریکی ثالثی میں مذاکرات کا آغاز

اٹلی کے دارالحکومت روم میں قائم امریکی سفارت خانے میں اسرائیل اور لبنان کے درمیان امریکی ثالثی میں اہم مذاکرات کا باقاعدہ آغاز ہو گیا ہے۔ خبر رساں ادارے کے مطابق، اسرائیلی اور لبنانی وفود بات چیت میں شرکت کے لیے امریکی سفارت خانے پہنچ چکے ہیں، جہاں ان مذاکرات کا بنیادی ایجنڈا جنوبی لبنان سے اسرائیلی افواج کے مرحلہ وار انخلا سے متعلق معاہدے پر حتمی پیش رفت کرنا ہے۔ لبنانی حکام نے تصدیق کی ہے کہ یہ اہم سفارتی بیٹھک منگل اور بدھ کے روز روم میں جاری رہے گی، جس میں امریکی ثالثوں کی موجودگی میں دونوں فریقین فریم ورک معاہدے پر عملدرآمد کے طریقہ کار اور آئندہ کے لائحہ عمل کا جائزہ لیں گے۔ واضح رہے کہ اسرائیل اور حزب اللہ کے درمیان حالیہ عسکری کشیدگی کے بعد امریکہ نے سرحدی صورتحال کو معمول پر لانے اور خطے میں طویل المدتی استحکام کو یقینی بنانے کے لیے اپنی سفارتی کوششیں تیز کر دی ہیں۔