پی ٹی آئی کا قومی اسمبلی کی قائمہ کمیٹیوں کے بائیکاٹ کا فیصلہ برقرار

پاکستان تحریک انصاف (پی ٹی آئی) نے قومی اسمبلی کی قائمہ کمیٹیوں کے بائیکاٹ کا اپنا فیصلہ برقرار رکھنے کا اعلان کیا ہے۔

قومی اسمبلی میں پی ٹی آئی کے چیف وہپ ملک عامر ڈوگر نے میڈیا سے گفتگو کرتے ہوئے واضح کیا ہے کہ تحریک انصاف نے تا حال قائمہ کمیٹیوں میں واپسی کا کوئی فیصلہ نہیں کیا۔ انہوں نے ان خبروں کی سختی سے تردید کی جن میں دعویٰ کیا گیا تھا کہ پی ٹی آئی نے اسمبلی سیکرٹریٹ کو کمیٹیوں میں واپسی سے متعلق آگاہ کر دیا ہے۔ عامر ڈوگر کا کہنا تھا کہ ایسی تمام خبریں بے بنیاد اور حقیقت سے دور ہیں۔

دوسری جانب، ذرائع کا کہنا ہے کہ پی ٹی آئی کے ارکان قائمہ کمیٹیوں میں واپسی سے قبل بانی پی ٹی آئی سے باضابطہ مشاورت چاہتے ہیں۔ پارٹی قیادت کا موقف ہے کہ بانی پی ٹی آئی کی منظوری اور حتمی مشاورت کے بعد ہی کمیٹیوں میں شرکت سے متعلق اگلا لائحہ عمل طے کیا جائے گا۔