مولانا نے پوری تاریخِ اسلام کے شہدا کی تضحیک کی: فیاض الحسن

استحکامِ پاکستان پارٹی (آئی پی پی) کے ترجمان فیاض الحسن چوہان نے جمعیت علمائے اسلام (ف) کے سربراہ مولانا فضل الرحمان کے حالیہ بیان پر شدید غم و غصے کا اظہار کرتے ہوئے کہا ہے کہ انہوں نے پوری تاریخِ اسلام کے شہدا کی تضحیک کی ہے۔ اسلام آباد میں ایک ہنگامی پریس کانفرنس سے خطاب کرتے ہوئے فیاض الحسن چوہان نے واضح کیا کہ پاک فوج کے جوان کسی تنخواہ یا مادی فائدے کے لیے نہیں، بلکہ اپنے وطن، قوم اور نظریے کے دفاع کی خاطر اپنی جانوں کا نذرانہ پیش کرتے ہیں۔ انہوں نے کہا کہ شہدا اور غازیوں کی عظیم قربانیوں کو تنخواہ سے جوڑنا پوری قوم کے جذبات کو مجروح کرنے کے مترادف ہے۔ ترجمان نے مزید کہا کہ ایک طرف بھارت پاکستان کو غیر مستحکم کرنے کے لیے سازشیں کر رہا ہے اور دوسری طرف سرحدوں پر ہمارے جوان ان ناپاک عزائم کو ناکام بنانے کے لیے مسلسل قربانیاں دے رہے ہیں؛ میجر عدنان شہید اور شہید تحسین کے والد کا جذبہ وطن سے بے لوث محبت کا منہ بولتا ثبوت ہے۔ ان کا کہنا تھا کہ تنخواہ تو سیاست دان، ڈاکٹر اور دیگر شعبوں کے افراد بھی لیتے ہیں، لیکن اس بنیاد پر ملکی بقا کے لیے جان دینے والوں کی قربانی کا موازنہ نہیں کیا جا سکتا۔