پاکستان اور بنگلہ دیش کا خواتین کو بااختیار بنانے اور دوطرفہ تعاون بڑھانے پر اتفاق

پاکستان اور بنگلہ دیش کے درمیان خواتین کو بااختیار بنانے اور مختلف شعبوں میں دوطرفہ تعاون کو وسعت دینے پر اصولی اتفاق ہو گیا ہے۔ ترجمان دفتر خارجہ کے مطابق بنگلہ دیش کے وزیر برائے سماجی بہبود ڈاکٹر زاہد حسین نے نائب وزیراعظم اور وزیر خارجہ اسحاق ڈار سے ملاقات کی، جس میں دونوں ممالک کے درمیان تعلقات کو مزید مضبوط بنانے پر تفصیلی تبادلہ خیال کیا گیا۔ ملاقات کے دوران نائب وزیراعظم اسحاق ڈار نے او آئی سی (OIC) خواتین وزارتی کانفرنس میں شرکت پر بنگلہ دیشی وزیر کا خیرمقدم کیا اور او آئی سی کے پلیٹ فارم سمیت تمام بین الاقوامی فورمز پر خواتین کو بااختیار بنانے کے لیے پاکستان کے پختہ عزم کا اعادہ کیا۔ ترجمان نے مزید بتایا کہ دونوں رہنماؤں نے باہمی دلچسپی کے امور خصوصاً تجارت، تعلیم، سماجی بہبود اور عوامی روابط (People-to-People Contacts) کے شعبوں میں تعاون کو مزید فروغ دینے کے امکانات کا جائزہ لیا اور پاک بنگلہ دیش تعلقات کو نئی بلندیوں پر لے جانے کے عزم کا اظہار کیا۔