امریکی حملے اقوام متحدہ کے چارٹر کی کھلی خلاف ورزی ہیں، ایرانی وزارت خارجہ

ایرانی وزارتِ خارجہ نے امریکہ پر جنگ بندی معاہدے کی سنگین خلاف ورزی کا الزام عائد کرتے ہوئے کہا ہے کہ گزشتہ 24 گھنٹوں کے دوران کیے گئے امریکی فضائی حملے بین الاقوامی قوانین اور اقوامِ متحدہ (UN) کے چارٹر کی کھلی خلاف ورزی کے زمرے میں آتے ہیں۔

ایرانی وزارتِ خارجہ کی طرف سے جاری کردہ ایک باضابطہ اور سخت گیر بیان میں کہا گیا ہے کہ دونوں ممالک کے درمیان طے پانے والے جنگ بندی معاہدے کو ابھی محض 25 روز ہی گزرے ہیں، لیکن امریکہ نے ایران کی خود مختاری پر براہِ راست حملے کر کے اس امن معاہدے کی کم و بیش تمام شقوں کو یکسر پامال کر دیا ہے۔ بیان میں مؤقف اختیار کیا گیا ہے کہ واشنگٹن نے اسٹریٹجک آبی گزرگاہ ‘آبنائے ہرمز’ سے متعلق ایرانی انتظامات اور سکیورٹی معاملات میں ناجائز مداخلت کی، جس کے باعث خطے میں شدید عدم تحفظ پھیلا اور عالمی تجارتی بحری نقل و حرکت میں تعطل پیدا ہوا۔

ترجمان ایرانی وزارتِ خارجہ کے مطابق، امریکی فورسز نے حالیہ کارروائیوں میں ایران کے ٹرانسپورٹ انفراسٹرکچر، سویلین و تجارتی جہازوں، کارگو شپنگ اور فضائی تنصیبات کو دانستہ طور پر نشانہ بنایا ہے، جو کہ جنگی جرائم کے مترادف ہے۔ ایرانی حکومت نے اپنے ہمسایہ اور خطے کے ممالک کو سخت الفاظ میں خبردار کیا ہے کہ وہ اپنی سرزمین، فضائی حدود یا فوجی اڈوں کو ایران کے خلاف کسی بھی قسم کی امریکی فوجی کارروائیوں کے لیے استعمال ہونے کی اجازت نہ دیں۔ بیان کے اختتام پر واضح کیا گیا کہ ایران خطے میں نئی جنگ کا ہرگز خواہاں نہیں ہے، تاہم اگر اس پر دوبارہ کوئی حملہ ہوا تو ایرانی افواج دفاعی کارروائی کے تحت اس حملے کے مقام (اوریجن) کو اپنا جائز فوجی ہدف سمجھیں گی اور بھرپور جواب دیا جائے گا۔