بنگلادیش میں طوفانی بارشوں کے باعث 44 افراد ہلاک،متعدد لاپتہ

بنگلہ دیش میں گزشتہ کئی روز سے جاری شدید مون سون بارشوں، تباہ کن سیلاب اور لینڈ سلائیڈنگ کے نتیجے میں مختلف حادثات میں کم از کم 44 افراد ہلاک ہو گئے ہیں۔ میڈیا رپورٹس کے مطابق، موسلا دھار بارشوں کی وجہ سے متعدد سڑکیں اور پل تباہ ہو چکے ہیں جبکہ ہزاروں مکانات زیرِ آب آنے سے امدادی سرگرمیوں میں شدید مشکلات کا سامنا ہے۔ سرکاری حکام کا کہنا ہے کہ سیلاب سے تقریباً 2 لاکھ 68 ہزار خاندان براہِ راست متاثر ہوئے ہیں، جنہیں فوج اور بحریہ کی مدد سے کشتیوں کے ذریعے خوراک، پینے کا صاف پانی اور طبی امداد فراہم کی جا رہی ہے۔ کاکس بازار میں قائم روہنگیا پناہ گزین کیمپوں میں بھی مٹی کے تودے گرنے سے متعدد ہلاکتیں ہوئی ہیں اور مزید لینڈ سلائیڈنگ کے خطرے کے پیشِ نظر لوگوں کو محفوظ مقامات پر منتقل کیا جا رہا ہے۔ دوسری جانب، وزیراعظم پاکستان شہباز شریف نے بنگلہ دیش میں ہونے والے جانی و مالی نقصانات پر گہرے دکھ کا اظہار کرتے ہوئے بنگلہ دیشی حکومت اور عوام کے ساتھ مکمل یکجہتی کا اعادہ کیا ہے اور کہا ہے کہ پاکستان مشکل کی اس گھڑی میں اپنے بنگلہ دیشی بھائیوں کے ساتھ کھڑا ہے۔