قومی ہاکی ٹیم کے غیر ملکی کوچز پاکستان پہنچ گئے، ذمہ داریاں سنبھال لیں

قومی ہاکی ٹیم کے غیر ملکی کوچز پاکستان پہنچ گئے ہیں اور انہوں نے ملک میں ہاکی کی کھوئی ہوئی ساکھ کی بحالی اور کھیل کی بہتری کے لیے اپنی ذمہ داریاں باقاعدہ طور پر سنبھال لی ہیں۔ پاکستان آنے والے کوچنگ سٹاف میں فٹنس کوچ ڈیوڈ ڈائر، گول کیپنگ سپیشلسٹ باب ویلڈوف، جبکہ ٹیکنیکل کوچ اور سپورٹس سائیکالوجسٹ کرس بوون شامل ہیں۔ اپنے دورے کے آغاز پر غیر ملکی کوچز نے پاکستان ہاکی فیڈریشن (پی ایچ ایف) کی انتظامیہ سے ایک اہم ملاقات کی، جس میں قومی ہاکی پروگرام کے مستقبل کے روڈ میپ پر تفصیلی تبادلہ خیال کیا گیا۔ اس موقع پر پاکستان میں ہاکی کی مجموعی ترقی، کھلاڑیوں کی جسمانی و ذہنی استعداد کار میں اضافے اور کھیل کے معیار کو بین الاقوامی سطح پر لانے کے لیے طویل المدتی اور جامع پلان تیار کرنے پر مکمل اتفاق کیا گیا۔