ہائبرڈ نظام نے ملکی معیشت اور سیکیورٹی کو شدید نقصان پہنچایا: مولانا فضل الرحمان اور اختر مینگل کا اتفاق

بلوچستان نیشنل پارٹی (بی این پی) کے سربراہ سردار اختر جان مینگل نے ایک اعلیٰ سطحی وفد کے ہمراہ جمعیت علمائے اسلام (جے یو آئی) کے سربراہ مولانا فضل الرحمان سے ان کی رہائش گاہ پر اہم ملاقات کی، جس میں ملک کی موجودہ سیاسی صورتحال پر تفصیلی گفتگو کی گئی۔

جے یو آئی کے ترجمان اسلم غوری کی جانب سے جاری کردہ تفصیلات کے مطابق، اس بیٹھک میں خصوصاً بلوچستان میں امن و امان کی دگرگوں صورتحال پر گہرائی سے غوروخوض کیا گیا اور دونوں اطراف سے اس پر انتہائی تشویش کا اظہار کیا گیا۔ ملاقات میں دونوں رہنماؤں نے اس امر پر مکمل اتفاق کیا کہ امن و امان کی موجودہ سنگین صورتحال کسی بھی صورت ملک اور قوم کے مستقبل کے لیے امید افزاء نہیں ہے۔

رہنماؤں نے مشترکہ مؤقف اختیار کرتے ہوئے کہا کہ ملک میں رائج موجودہ ہائبرڈ نظام کی وجہ سے معیشت اور امن و امان دونوں کو شدید نقصان پہنچا ہے۔ اس اہم سیاسی ملاقات میں جے یو آئی کے رہنما اسلم غوری، سینیٹر کامران مرتضیٰ، مولانا صلاح الدین ایوبی اور مولانا عبید الرحمان بھی موجود تھے۔