بلوچستان کے ضلع لورالائی اورگردونواح میں زلزلے کے جھٹکے

بلوچستان کے ضلع لورالائی اور اس کے گردونواح میں زلزلے کے شدید جھٹکے محسوس کیے گئے ہیں، جس کے باعث شہریوں میں شدید خوف و ہراس پھیل گیا اور لوگ کلمہ طیبہ کا ورد کرتے ہوئے اپنے گھروں سے باہر نکل آئے۔ زلزلہ پیما مرکز کے مطابق، ریکٹڑ اسکیل پر زلزلے کی شدت 4.4 ریکارڈ کی گئی، جبکہ اس کی گہرائی زمین کے اندر 12 کلومیٹر تھی۔ زلزلہ پیما مرکز نے مزید بتایا کہ زلزلے کا بنیادی مرکز لورالائی سے 31 کلومیٹر مشرق کی جانب تھا۔ خوش قسمتی سے، زلزلے کے نتیجے میں فی الحال کسی قسم کے جانی یا مالی نقصان کی کوئی اطلاع موصول نہیں ہوئی ہے۔