معروف سماجی شخصیت عبدالستار ایدھی کو ہم سے بچھڑے 10 برس بیت گئے

انسان دوست اور دکھی انسانیت کی خدمت کے لیے اپنی زندگی وقف کر دینے والی پاکستان کی معروف اور مایہ ناز سماجی شخصیت عبدالستار ایدھی کو ہم سے بچھڑے 10 برس بیت گئے ہیں۔

عبدالستار ایدھی نے بلا رنگ و نسل اور بغیر کسی تفریق کے انسانیت کی خدمت میں اپنی پوری عمر گزار دی۔ ان کی سماجی خدمات کا لگایا گیا پودا آج “ایدھی فاؤنڈیشن” کے نام سے ایک تناور درخت بن چکا ہے، جو پورے پاکستان میں ریسکیو اور ایمرجنسی آپریشنز کرنے کے ساتھ ساتھ غریب، لاچار اور بے سہارا افراد کی رہائش اور کھانے پینے کا ملک گیر انتظام چلا رہا ہے۔

عبدالستار ایدھی 28 فروری 1928ء کو بھارتی ریاست گجرات کے شہر بانٹوا میں پیدا ہوئے اور قیامِ پاکستان کے بعد 1947ء میں اپنے خاندان کے ہمراہ ہجرت کر کے کراچی میں آباد ہوئے۔ انہوں نے 1951ء میں انسانیت کی خدمت کا آغاز ایک چھوٹی سی ڈسپنسری سے کیا، اور بعد میں “ایدھی ٹرسٹ” کی بنیاد رکھی جو وقت کے ساتھ ساتھ دنیا کے بڑے فلاحی نیٹ ورکس میں شامل ہو گیا۔

دنیا کی سب سے بڑی رضاکارانہ ایمبولینس سروس چلانے کا عالمی اعزاز بھی عبدالستار ایدھی کو ہی حاصل ہے۔ دکھی انسانیت کے لیے ان کی عظیم خدمات کے اعتراف میں حکومتِ پاکستان نے 1989ء میں انہیں اعلیٰ ترین سول اعزاز “نشانِ امتیاز” سے بھی نوازا۔

عظیم سماجی رہنما 8 جولائی 2016ء کو گردوں کے عارضے کے سبب 88 برس کی عمر میں اس فانی دنیا سے رخصت ہو گئے تھے، جنہیں مکمل سرکاری اعزاز کے ساتھ کراچی کے ایدھی ولیج میں سپردِ خاک کیا گیا تھا۔ دنیا بھر میں انسانیت کے لیے ان کی لازوال خدمات کو ہمیشہ سنہرے حروف میں یاد رکھا جائے گا۔