ایرانی صدر دورہ پاکستان مکمل کرنے کے بعد وطن روانہ

ایرانی صدر ڈاکٹر مسعود پزشکیان اپنا اہم اور کامیاب دورہ پاکستان مکمل کرنے کے بعد واپس وطن روانہ ہو گئے ہیں۔ نور خان ایئربیس پر معزز مہمان کو رخصت کرنے کے لیے نائب وزیراعظم و وزیر خارجہ اسحاق ڈار، فیلڈ مارشل سید عاصم منیر اور وفاقی وزیر داخلہ محسن نقوی سمیت اعلیٰ حکام موجود تھے، جنہوں نے ایرانی صدر کو الوداع کیا۔ اس موقع پر ایرانی صدر کو ان کے دورۂ پاکستان کی یادگار اور خوبصورت تصاویر پر مشتمل ایک خصوصی البم بھی پیش کیا گیا۔ روانگی سے قبل گفتگو کرتے ہوئے مسعود پزشکیان نے پرتپاک استقبال، شاندار مہمان نوازی اور خصوصی محبت پر پاکستانی قوم اور حکومت کا تہہ دل سے شکریہ ادا کیا۔ انہوں نے پاکستان اور ایران کے درمیان برادرانہ اور تہذیبی تعلقات کو مزید مضبوط بنانے کے پختہ عزم کا اظہار کرتے ہوئے امید ظاہر کی کہ اس دورے کے بعد دونوں ممالک کے درمیان مختلف شعبوں میں باہمی تعاون کو مزید فروغ ملے گا۔