قومی اسمبلی میں بجٹ پر بحث مکمل، 232 ارکان نے حصہ لیا

اسلام آباد: سپیکر قومی اسمبلی سردار ایاز صادق نے اعلان کیا ہے کہ ایوانِ زیریں میں وفاقی بجٹ پر بحث کا عمل مکمل کر لیا گیا ہے۔ بجٹ پر مسلسل سات روز تک جاری رہنے والی اس طویل بحث میں مجموعی طور پر 232 اراکینِ پارلیمنٹ نے حصہ لیا۔ سپیکر نے تفصیلات بتاتے ہوئے کہا کہ بحث میں حکومت کی جانب سے 151 اور اپوزیشن کے 81 اراکین شامل ہوئے۔ اراکین نے مجموعی طور پر 53 گھنٹے 31 منٹ تک بجٹ پر سیر حاصل گفتگو کی، جس میں سے حکومتی اراکین نے 34 گھنٹے 33 منٹ جبکہ اپوزیشن نے 18 گھنٹے 58 منٹ کا وقت استعمال کیا۔ انہوں نے واضح کیا کہ اپوزیشن کو طے شدہ وقت سے 8 گھنٹے 18 منٹ زائد وقت دیا گیا۔

پارٹی پوزیشن کے حوالے سے سپیکر ایاز صادق نے بتایا کہ مسلم لیگ (ن) کے 77، پاکستان پیپلز پارٹی کے 49 اور ایم کیو ایم کے 20 ارکان نے بجٹ بحث میں حصہ لیا جبکہ اپوزیشن بنچوں سے تحریک انصاف کے 67، جے یو آئی (ف) کے 10 اور سنی اتحاد کونسل کا ایک رکن بحث میں شامل ہوا۔ دوسری جانب، وفاقی وزیر خزانہ محمد اورنگزیب نے بجٹ پر بحث سمیٹتے ہوئے ایوان کو یقین دہانی کرائی کہ بجٹ کی حتمی دستاویز میں اراکینِ قومی اسمبلی کی جانب سے سامنے آنے والی تعمیری اور اہم تجاویز کو بھی شامل کر لیا گیا ہے۔