ایران پاکستان کی مخلصانہ کاوشوں کو ہمیشہ یاد رکھے گا: ایرانی سفیر

پاکستان میں تعینات ایرانی سفیر رضا امیری مقدم نے پارلیمنٹ ہاؤس میں سپیکر قومی اسمبلی سردار ایاز صادق سے ایک اہم ملاقات کی ہے، جس میں امریکہ اور ایران کے درمیان طے پانے والے تاریخی امن معاہدے، پاک۔ایران دوطرفہ تعلقات اور خطے کی مجموعی سیاسی و سکیورٹی صورتحال پر تفصیلی تبادلہ خیال کیا گیا۔ اس موقع پر سپیکر قومی اسمبلی سردار ایاز صادق نے ایران اور امریکہ کے مابین امن معاہدے پر ایرانی قیادت اور وہاں کے عوام کو دل کی گہرائیوں سے مبارکباد پیش کرتے ہوئے اس کا بھرپور خیرمقدم کیا۔ سردار ایاز صادق کا کہنا تھا کہ یہ معاہدہ خطے میں دیرپا امن، استحکام اور باہمی اعتماد کے فروغ کی جانب ایک مثبت اور انتہائی حوصلہ افزا قدم ہے، جو علاقائی کے ساتھ ساتھ عالمی سطح پر امن کے قیام میں کلیدی کردار ادا کرے گا۔

ملاقات کے دوران ایرانی سفیر رضا امیری مقدم نے دونوں ممالک کے مابین جنگ بندی اور اس عظیم امن معاہدے کے حصول کے لیے پاکستان کی پارلیمنٹ، حکومت، سفارتی برادری اور سول و عسکری قیادت کی مخلصانہ کوششوں اور کامیاب ترین سفارتکاری کو شاندار الفاظ میں سراہتے ہوئے انہیں زبردست خراجِ تحسین پیش کیا۔ ایرانی سفیر نے واضح کیا کہ ایران کی حکومت اور عوام، اس کٹھن مرحلے پر پاکستان کی عسکری و سیاسی قیادت اور یہاں کے عوام کی جانب سے ادا کیے گئے مخلصانہ اور برادرانہ کردار کو تاریخ میں ہمیشہ سنہری حروف سے یاد رکھیں گے۔ ملاقات میں دونوں رہنماؤں نے پاک۔ایران دوطرفہ برادرانہ تعلقات کو مزید مضبوط بنانے، باہمی دلچسپی کے امور پر تعاون بڑھانے اور پارلیمانی روابط کو وسعت دینے پر مکمل اتفاق کیا، جس کے بعد ایرانی سفیر نے اپنے وفد کے ہمراہ قومی اسمبلی کے جاری اجلاس کی کارروائی کا آنکھوں دیکھا حال بھی دیکھا۔