عمران خان کو معائنے کے بعد دوبارہ اڈیالہ منتقل کردیا گیا: بیرسٹر گوہر

پاکستان تحریک انصاف (پی ٹی آئی) کے چیئرمین بیرسٹر گوہر علی خان نے بتایا ہے کہ پارٹی کے بانی عمران خان کو ہسپتال میں طبی معائنے اور مبینہ طور پر انجیکشن لگائے جانے کے بعد دوبارہ راولپنڈی کی اڈیالہ جیل منتقل کر دیا گیا ہے۔ سماجی رابطے کے پلیٹ فارم “ایکس” (سابقہ ٹویٹر) پر جاری اپنے ایک اہم بیان میں بیرسٹر گوہر کا کہنا تھا کہ انہیں یہ اطلاع موصول ہوئی ہے کہ عمران خان کو گزشتہ شب دوبارہ طبی معائنے اور انجیکشن لگانے کے لیے اسلام آباد کے پمز (PIMS) ہسپتال منتقل کیا گیا تھا، جہاں ضروری طبی عمل کے بعد انہیں واپس جیل بھیج دیا گیا ہے۔

چیئرمین پی ٹی آئی بیرسٹر گوہر علی خان نے پارٹی قیادت کی جانب سے اپنے دیرینہ مطالبے کا اعادہ کرتے ہوئے کہا کہ بانی پی ٹی آئی کی صحت کے پیشِ نظر انہیں مستقل علاج کے لیے فوری طور پر ہسپتال منتقل کیا جائے، جہاں ان کا تفصیلی معائنہ ہو سکے۔ اس کے ساتھ ہی انہوں نے وفاقی حکومت اور جیل انتظامیہ سے پرزور مطالبہ کیا کہ عمران خان کی ان کے اہل خانہ سے فوری اور بلا تعطل ملاقات کروائی جائے تاکہ ان کی صحت اور خیر عافیت کے حوالے سے تشویش دور ہو سکے۔