کراچی، لاہور اور اسلام آباد ایئرپورٹس پر مسافروں کے لیے چیئر لفٹ، کیبل کار اور زپ لائن لگانے کا فیصلہ

پاکستان ایئرپورٹ اتھارٹی نے ملک کے بڑے ایئرپورٹس پر مسافروں کے لیے جدید اور تفریحی سہولیات متعارف کرانے کا فیصلہ کیا ہے۔

ذرائع کے مطابق کراچی، لاہور اور اسلام آباد ایئرپورٹس پر چیئر لفٹ، کیبل کار اور زپ لائن نصب کرنے کی منصوبہ بندی کی گئی ہے۔

پاکستان ایئرپورٹ اتھارٹی کے شعبہ کمرشل کی جانب سے اس منصوبے کے لیے ٹینڈر جاری کر دیا گیا ہے۔

منصوبے کے تحت مسافروں کو ٹرمینل بلڈنگ سے کار پارکنگ تک زپ لائن، کیبل کار اور چیئر لفٹ کی سہولت فراہم کی جائے گی۔

اتھارٹی حکام کے مطابق اس اقدام کا مقصد مسافروں کو نہ صرف سہولت فراہم کرنا ہے بلکہ ان کے سفر کے تجربے کو مزید دلچسپ اور پرکشش بنانا بھی ہے۔

پاکستان ایئرپورٹ اتھارٹی کے شعبہ کمرشل نے دلچسپی رکھنے والی کمپنیوں سے درخواستیں طلب کر لی ہیں جبکہ درخواستیں ڈائریکٹر کمرشل ہیڈکوارٹر کراچی کو ارسال کرنے کی ہدایت کی گئی ہے۔