تامل ناڈومیں شراب کی 700سے زائد دکانیں بندکردی جائیں، نئے وزیراعلیٰ وجے جوزف کا اہم فیصلہ

جنوبی بھارتی ریاست تامل ناڈو کے نئے وزیراعلیٰ اور سابق فلمی سپر اسٹار جوزف وجے نے اقتدار سنبھالتے ہی ریاست بھر میں شراب کی 700 سے زائد سرکاری دکانیں بند کرنے کا حکم دے دیا۔

میڈیا رپورٹس کے مطابق وزیراعلیٰ وجے نے مندروں، اسکولز اور بس اسٹینڈز کے 500 میٹر کے دائرے میں قائم 717 شراب کی دکانیں بند کرنے کی ہدایت جاری کی ہے۔

یہ دکانیں تامل ناڈو اسٹیٹ مارکیٹنگ کارپوریشن کے تحت چلائی جاتی تھیں۔ حکام کو دو ہفتوں کے اندر ان دکانوں کو مکمل طور پر بند کرنے کا حکم دیا گیا ہے۔

وجے کے اس اقدام کو ریاست میں شراب نوشی کم کرنے اور سماجی مسائل پر قابو پانے کی کوشش قرار دیا جا رہا ہے۔

حالیہ ریاستی انتخابات میں وجے کی جماعت ٹی وی کے نے 234 رکنی اسمبلی میں 108 نشستیں حاصل کیں اور اتحادی جماعتوں کی حمایت سے اکثریت حاصل کرکے حکومت بنانے میں کامیاب ہوئی۔