معاملات سفارتی طریقے سے حل ہونے لگتے ہیں توامریکا فوجی مہم جوئی شروع کردیتاہے، ایرانی وزیرخارجہ

ایران کے وزیر خارجہ عباس عراقچی نے کہا ہے کہ جب بھی سفارتی طریقے سے معاملات حل کی جانب بڑھتے ہیں تو عین اسی موقع پر امریکاایک خطرناک فوجی مہم جوئی کا انتخاب کرتا ہے۔

سوشل میڈیاپربیان میں ایرانی وزیر خارجہ نے استفسار کیا کہ کیا یہ محض دباؤ ڈالنے کی ایک بھونڈی حکمت عملی ہے؟ یا پھر کسی تخریب کار کی کارستانی، جو ایک بار پھر امریکی صدر کو ایک نئی دلدل میں دھکیل رہی ہے؟

ان کا مزید کہنا تھا کہ وجوہات کچھ بھی ہوں، نتیجہ ہمیشہ ایک ہی رہتا ہے اور وہ یہ کہ ایرانی کبھی دباؤ کے آگے جھکتے نہیں ہیں۔

عباس عراقچی نے امریکی سینٹرل انٹیلیجنس ایجنسی کی جانب سے ایران کے میزائل ذخائر سے متعلق اندازوں کو بھی غلط قرار دیا ہے۔

انہوں نے دعویٰ کیا کہ ہمارے میزائل کے ذخائر اور لانچرز کی صلاحیت 31 مارچ کے مقابلے میں 75 فیصد نہیں ہے، صحیح اعداد و شمار 120 فیصد ہیں۔

ایرانی وزیر خارجہ کا یہ بیان گذشتہ رات آبنائے ہرمز میں امریکا اور ایران کے درمیان ہونے والی ایک مختصر جھڑپ کے بعد سامنے آیا ہے۔