پاکستان میں بے روزگاری کی شرح میں اضافہ ،لیبر فورس سروے کے نتائج جاری

اسلام آباد: قومی لیبر فورس سروے 2024 کے مطابق پاکستان میں بے روزگاری کی شرح بڑھ کر 7.1 فیصد ہو گئی ہے، جب کہ سال 2020-21 میں یہ شرح 6.3 فیصد تھی۔ گزشتہ پانچ سالوں میں بے روزگاری میں 0.8 فیصد اضافہ ریکارڈ کیا گیا ہے۔

سروے کے مطابق اس وقت تقریباً 59 لاکھ افراد بے روزگار ہیں۔ سال 2023 کی مردم شماری کے مطابق ملکی آبادی 24 کروڑ 14 لاکھ 90 ہزار ہے، جبکہ ورکنگ ایج پاپولیشن کی شرح 43 فیصد اور غیر فعال آبادی 53.8 فیصد ہے۔

روزگار کے شعبوں میں سروسز سیکٹر سب سے آگے ہے، جس میں 3 کروڑ 18 لاکھ 30 ہزار افراد برسر روزگار ہیں اور ایمپلائمنٹ کی شرح 41.7 فیصد ہے۔ زرعی شعبے میں 2 کروڑ 55 لاکھ 30 ہزار افراد کام کر رہے ہیں اور روزگار کی شرح 33.1 فیصد ہے۔ صنعتی شعبے میں 1 کروڑ 98 لاکھ 60 ہزار افراد برسر روزگار ہیں، جس کی شرح 25.7 فیصد ریکارڈ کی گئی۔

سروے کے مطابق ملک میں فی کس ماہانہ اوسط اجرت 39 ہزار 42 روپے ہے، جو گزشتہ پانچ سال میں 15 ہزار 14 روپے سے بڑھ گئی۔ مرد حضرات کی ماہانہ اوسط اجرت 39 ہزار 302 روپے اور خواتین کی 37 ہزار 347 روپے ہے۔