امریکہ نے جنگ بندی کی خلاف ورزی کی، جارحیت کا بھرپور جواب دیں گے: ایران

ایران کے خاتم الانبیا مرکزی ہیڈ کوارٹرز کے ترجمان نے دعویٰ کیا ہے کہ امریکی فورسز نے آبنائے ہرمز کی جانب بڑھنے والے ایک ایرانی آئل ٹینکر اور فجیرہ بندرگاہ کے قریب ایک اور بحری جہاز کو نشانہ بنا کر جنگ بندی کی خلاف ورزی کی ہے۔ ترجمان کے مطابق، امریکہ نے خطے کے بعض ممالک کے تعاون سے جاسک، خمیر، سیریک اور جزیرہ قشم کے ساحلی علاقوں میں شہری آبادی پر بھی فضائی حملے کیے۔ جواب میں ایرانی فوج نے چابہار بندرگاہ کے جنوب اور آبنائے ہرمز کے مشرق میں موجود امریکی جنگی جہازوں کو نشانہ بنایا، جس سے انہیں بھاری نقصان پہنچنے کا دعویٰ کیا گیا ہے۔ ایرانی قیادت نے خبردار کیا ہے کہ مستقبل میں ایسی کسی بھی کارروائی کا انتہائی سخت اور تباہ کن جواب دیا جائے گا۔