مقبوضہ کشمیر میں ٹریفک حادثہ، 21 افراد جاں بحق، درجنوں زخمی

مقبوضہ کشمیر کے ضلع ادھم پور میں ایک ہولناک ٹریفک حادثے نے درجنوں خاندانوں میں صفِ ماتم بچھا دی ہے، جہاں مسافروں سے بھری ایک بس گہری کھائی میں گرنے سے کم از کم 21 افراد جاں بحق اور 40 سے زائد زخمی ہو گئے۔ حکام کے مطابق، یہ افسوسناک واقعہ کانوٹ گاؤں کے قریب اس وقت پیش آیا جب رام نگر سے ادھم پور جانے والی بس، جو اپنی گنجائش سے زیادہ مسافروں سے لدی ہوئی تھی، ایک خطرناک موڑ پر آٹو رکشہ سے ٹکرانے کے بعد بے قابو ہو کر 100 فٹ گہری کھائی میں جا گری۔

ریسکیو ذرائع کا کہنا ہے کہ بس میں 60 سے زائد افراد سوار تھے، جن میں سے 19 مسافر موقع پر ہی جاں بحق ہو گئے جبکہ دو زخمیوں نے ہسپتال میں دم توڑا۔ حادثے میں زخمی ہونے والے 45 افراد میں سے کئی کی حالت نازک بتائی جا رہی ہے، جس کے باعث ہلاکتوں میں اضافے کا خدشہ ظاہر کیا جا رہا ہے۔ مقامی ماہرین کا کہنا ہے کہ مقبوضہ وادی کے پہاڑی علاقوں میں تیز رفتاری، اوور لوڈنگ اور سڑکوں کی خستہ حالی ایسے خونریز حادثات کی بڑی وجوہات ہیں۔