دنیا بھرمیں پاکستان آج امن کے پیامبر کے طور پر جانا جا رہا ہے: طاہر اشرفی

چیئرمین پاکستان علما کونسل حافظ طاہر اشرفی نے کہا ہے کہ حالیہ سفارتی کامیابیوں کے بعد آج پوری دنیا میں پاکستان کی پہچان ایک “امن کے پیامبر” کے طور پر ہو رہی ہے۔ قومی پیغامِ امن کمیٹی سے خطاب کرتے ہوئے انہوں نے معرکہ حق میں پاکستان کی عظیم کامیابی پر اللہ کا شکر ادا کیا اور کہا کہ پاکستان نے ہمیشہ عالمی سطح پر امن اور انصاف کی آواز بلند کی ہے۔ حافظ طاہر اشرفی نے خطے میں کشیدگی کے خاتمے اور امن کی بحالی کے لیے وزیراعظم شہباز شریف اور فیلڈ مارشل عاصم منیر کی قیادت کو زبردست خراجِ تحسین پیش کیا۔

حافظ طاہر اشرفی نے اپنے خطاب میں کشمیر کو پاکستان کی شہ رگ قرار دیتے ہوئے واضح کیا کہ کشمیر اور فلسطین کے عوام کو ان کا بنیادی حقِ خود ارادیت ملنا ناگزیر ہے۔ انہوں نے زور دیا کہ عالمی برادری کو ان مظلوم اقوام کو انصاف فراہم کرنے کے لیے اپنا موثر کردار ادا کرنا چاہیے۔ ان کا مزید کہنا تھا کہ پاکستان کی موجودہ سول اور عسکری قیادت نے جس طرح دانشمندی سے ملک کا مقدمہ لڑا ہے، اس نے عالمی سطح پر پاکستان کے وقار میں اضافہ کیا ہے۔ پاکستان ہر فورم پر امن کا داعی رہے گا اور کشمیر و فلسطین کے دیرینہ مسائل کے حل تک اپنی اخلاقی و سفارتی حمایت جاری رکھے گا۔