بانی پی ٹی آئی سے ملاقات کے لیے بیرسٹر سلمان صفدر اڈیالہ جیل پہنچ گئے

اسلام آباد ہائی کورٹ کے واضح احکامات کی روشنی میں بانی پی ٹی آئی کے وکیل بیرسٹر سلمان صفدر اڈیالہ جیل پہنچ گئے ہیں، جہاں وہ اپنے موکل سے اہم قانونی مشاورت کریں گے۔ بیرسٹر سلمان صفدر نے القادر ٹرسٹ کیس میں زیرِ سماعت مرکزی اپیلوں پر دلائل کی تیاری کے لیے عدالتِ عالیہ سے بانی پی ٹی آئی سے ملاقات کی خصوصی استدعا کی تھی، جسے عدالت نے منظور کرتے ہوئے جیل حکام کو ملاقات کرانے کا حکم دیا تھا۔

ذرائع کے مطابق، بیرسٹر سلمان صفدر اڈیالہ جیل کے گیٹ نمبر 5 سے اندر داخل ہوئے، جہاں وہ بانی پی ٹی آئی سے کیس کے مختلف قانونی پہلوؤں اور آئندہ کی حکمتِ عملی پر تبادلہ خیال کریں گے۔ القادر ٹرسٹ کیس کی مرکزی اپیلیں اس وقت اسلام آباد ہائی کورٹ میں زیرِ سماعت ہیں اور قانونی ماہرین اس ملاقات کو کیس کے منطقی انجام اور دفاعی دلائل کے حوالے سے انتہائی اہمیت کا حامل قرار دے رہے ہیں۔ اس ملاقات کے بعد بیرسٹر سلمان صفدر عدالت میں بانی پی ٹی آئی کا موقف مزید تفصیل سے پیش کریں گے۔