اڈیالہ جیل کے باہر شدید کشیدگی: علیمہ خان کا پولیس تشدد اور کارکنوں کی گرفتاریوں پر شدید احتجاج

راولپنڈی کی اڈیالہ جیل میں بانی پی ٹی آئی سے ملاقات کے دن کے موقع پر صورتحال انتہائی کشیدہ ہو گئی ہے، جہاں بانی کی تینوں بہنیں فیکٹری ناکے پر موجود ہیں۔ اس موقع پر علیمہ خان نے پولیس پر شدید تنقید کرتے ہوئے الزام عائد کیا ہے کہ کارکنوں پر تشدد کیا جا رہا ہے اور ان کی گاڑیاں توڑی جا رہی ہیں۔ انہوں نے بتایا کہ بانی پی ٹی آئی کو جیل میں مکمل طور پر آئسولیٹ کر دیا گیا ہے اور کل دوپہر 2 بجے ملاقات کا وقت دیا گیا ہے، تاہم انہیں خدشہ ہے کہ جیل انتظامیہ ملاقات کراتی ہے یا نہیں۔ علیمہ خان نے دوٹوک انداز میں کہا کہ “ہم نہ ڈریں گے، نہ پیچھے ہٹیں گے” اور آج رات وہیں بیٹھ کر احتجاج ریکارڈ کرایا جائے گا۔

دوسری جانب، پی ٹی آئی رہنما شاہد خٹک کے مطابق پورے پاکستان سے قافلے اڈیالہ جیل کی جانب روانہ ہیں، جنہیں روکنے کے لیے موٹرویز پر گرفتاریاں کی جا رہی ہیں اور رکاوٹیں کھڑی کی گئی ہیں۔ پارٹی کی جانب سے تمام عہدیداروں اور عوام کو اڈیالہ پہنچنے کی کال دی گئی ہے، جبکہ سوشل میڈیا پر مختلف علاقوں سے قافلوں کی آمد کی ویڈیوز گردش کر رہی ہیں۔ علیمہ خان کا کہنا تھا کہ وہ پولیس کے اس وحشیانہ رویے کو دنیا کے سامنے لائیں گی اور کارکنوں کی بڑی تعداد رکاوٹوں کے باوجود اپنا احتجاج جاری رکھے گی۔