حافظ نعیم الرحمٰن کی ایرانی سفیر سے ملاقات، خطے کی صورتحال پر تبادلہ خیال

امیر جماعت اسلامی پاکستان حافظ نعیم الرحمٰن نے ایرانی سفیر سے ان کے دفتر میں ملاقات کی ہے، جس میں خطے کی بگڑتی ہوئی سیکیورٹی صورتحال اور ایران پر حالیہ جنگی اثرات پر تفصیلی تبادلہ خیال کیا گیا۔ ملاقات کے دوران حافظ نعیم الرحمٰن نے ایرانی قوم کی استقامت کو خراجِ تحسین پیش کرتے ہوئے واضح کیا کہ مشکل کی اس گھڑی میں پوری پاکستانی قوم اپنے ایرانی بہن بھائیوں کے ساتھ کھڑی ہے۔ انہوں نے مطالبہ کیا کہ امریکہ ایران پر حملے فوری بند کرے اور خطے میں کشیدگی ختم کرنے کے لیے اپنے فوجی اڈے ختم کرے۔

ایرانی سفیر نے پاکستانی حکومت، عوام اور بالخصوص جماعت اسلامی کے دوٹوک مؤقف پر شکریہ ادا کیا۔ حافظ نعیم الرحمٰن نے اس موقع پر مسلم ممالک کے درمیان اتحاد اور یکجہتی کی ضرورت پر زور دیتے ہوئے کہا کہ فلسطین کی آزادی اور مسجدِ اقصیٰ کی بازیابی تک امتِ مسلمہ کی جدوجہد جاری رہے گی۔ انہوں نے مزید کہا کہ خطے کا امن بیرونی مداخلت کے خاتمے اور مسلم ریاستوں کی خودمختاری کے احترام سے وابستہ ہے۔