پیٹرول پمپ ڈیلرز کا مارجن بڑھانے کا مطالبہ: “مطالبات تسلیم نہ ہوئے تو پمپ بند کر دیں گے”، پیٹرول پمپ ڈیلرز ایسوسی ایشن

پاکستان پیٹرول پمپ ڈیلرز ایسوسی ایشن کے رہنماؤں نے پیٹرولیم مصنوعات کی بڑھتی ہوئی قیمتوں اور کم شرحِ منافع (مارجن) پر شدید تشویش کا اظہار کرتے ہوئے حکومت کو وارننگ دی ہے کہ اگر ان کے مطالبات تسلیم نہ کیے گئے تو وہ پیٹرول پمپس بند کرنے پر مجبور ہو جائیں گے۔ اسلام آباد میں پریس کانفرنس کرتے ہوئے چیئرمین پیٹرول پمپ ڈیلرز ایسوسی ایشن سمیع خان نے کہا کہ 55 سالہ زندگی میں ملک کے ایسے حالات کبھی نہیں دیکھے؛ قیمتیں بڑھنے سے اخراجات پورے کرنا ناممکن ہو گیا ہے۔ انہوں نے واضح کیا کہ فی الحال ہڑتال کا اعلان نہیں کر رہے، لیکن مارجن نہ بڑھنے کی صورت میں کاروبار جاری رکھنا ممکن نہیں رہے گا۔

اسی موقع پر آل پیٹرولیم اونرز ایسوسی ایشن کے چیئرمین ہمایوں خان نے حکومت پر تنقید کرتے ہوئے کہا کہ قیمتوں میں اضافے کے باوجود ڈیلرز کا مارجن وہی ہے، جس سے کاروبار تباہ ہو رہا ہے۔ انہوں نے شکایت کی کہ پنجاب میں ڈیلرز کو چیکنگ کے نام پر ہراساں کیا جا رہا ہے، جبکہ بلوچستان میں اسمگل شدہ پیٹرول کی آمد کا سلسلہ برقرار ہے۔ ہمایوں خان کا کہنا تھا کہ ڈیلرز حکومت کے خلاف احتجاج نہیں کرنا چاہتے، لیکن مالی بوجھ کے باعث پمپس خود بخود بند ہونا شروع ہو جائیں گے۔ انہوں نے حکومت سے مطالبہ کیا کہ فوری طور پر ڈیلرز مارجن پر نظرِ ثانی کی جائے تاکہ پیٹرولیم سیکٹر کو مکمل بحران سے بچایا جا سکے۔