لیبیا کشتی حادثہ: منڈی بہاؤالدین کے 6 نوجوان جاں بحق، گھروں میں کہرام

لیبیا سے غیر قانونی طور پر اٹلی جانے والے تارکینِ وطن کی کشتی سمندر میں حادثے کا شکار ہو گئی ہے، جس کے نتیجے میں ضلع منڈی بہاؤالدین سے تعلق رکھنے والے 6 نوجوان ڈوب کر جاں بحق ہو گئے ہیں۔ ذرائع کے مطابق، 105 افراد پر مشتمل یہ کشتی ساحل کے قریب بپھری ہوئی لہروں کی نذر ہو گئی، جس میں سے اب تک 30 افراد کو زندہ بچایا جا سکا ہے جبکہ باقی افراد کی تلاش کے لیے ریسکیو آپریشن جاری ہے۔ جاں بحق اور لاپتہ ہونے والوں میں تحصیل پھالیہ کے گاؤں ٹھٹہ کدیوالہ کے طیب عباس، عرفان بشیر، تنویر صادق اور فیضان ساجد سمیت رنمل شریف کا اقبال ارشد اور پنڈی لالہ کا سعد ظفر شامل ہیں۔ حادثے میں معجزاتی طور پر بچ جانے والے عمران اصغر گھمن نے اٹلی کے پناہ گزین کیمپ سے اپنے اہل خانہ کو اس المناک واقعے کی اطلاع دی، جس کے بعد متاثرہ علاقوں میں کہرام مچ گیا اور قیمتی جانوں کے ضیاع پر فضا سوگوار ہے۔