معاشی ٹیم کی ٹیکس تجاویز مسترد، منی بجٹ نہیں آئے گا: وزیراعظم

وزیراعظم شہباز شریف نے ملک میں منی بجٹ لانے اور سالانہ بجٹ قبل از وقت پیش کرنے کی تمام تجاویز کو دوٹوک انداز میں مسترد کر دیا ہے۔ وزارتِ خزانہ کے ذرائع کے مطابق، معاشی ٹیم نے ریونیو شارٹ فال پورا کرنے اور مشرقِ وسطیٰ کی حالیہ کشیدگی کے تناظر میں پٹرولیم مصنوعات پر سیلز ٹیکس سمیت مختلف نئے ٹیکسوں کی تجاویز پیش کی تھیں، جنہیں وزیراعظم نے عوامی مفاد میں نامظور کر دیا۔ وزیراعظم کا کہنا تھا کہ عالمی مارکیٹ میں تیل کی بڑھتی ہوئی قیمتوں سے عوام پہلے ہی پریشان ہیں، لہٰذا مزید ٹیکسوں کا بوجھ نہیں ڈالا جائے گا اور آئی ایم ایف کو موجودہ صورتحال میں ریلیف کے لیے قائل کیا جائے۔ انہوں نے معاشی ٹیم کو ہدایت کی کہ سالانہ بجٹ جون کے پہلے یا دوسرے ہفتے سے قبل پیش نہ کیا جائے اور تمام تر توجہ عوام کو ریلیف فراہم کرنے والے اقدامات پر مرکوز رکھی جائے۔ اس فیصلے سے واضح ہو گیا ہے کہ حکومت فی الوقت کسی بھی ہنگامی ٹیکس کے بجائے معاشی استحکام اور عوامی سہولت کو ترجیح دے رہی ہے۔