وزیرِ اعظم کی زیرصدارت اجلاس: ایندھن سبسڈی اور عوامی ریلیف کے اقدامات پر بریفنگ

اسلام آباد: وزیرِ اعظم محمد شہباز شریف کی سربراہی میں اجلاس میں پیٹرولیم مصنوعات پر سبسڈی کے نفاذ، کرایوں میں اضافہ روکنے اور عوامی ریلیف کے اقدامات کا جائزہ لیا گیا۔ اجلاس میں ملک میں ایندھن کے ذخائر، کھپت اور حکومتی کفایت شعاری اقدامات پر تفصیلی بریفنگ دی گئی۔

اجلاس میں فیصلہ کیا گیا کہ مسافر بسوں کو ماہانہ 1 لاکھ، منی بس اور ویگنوں کو 40 ہزار روپے، ٹرکوں کو 70 ہزار، بڑی مال بردار گاڑیوں کو 80 ہزار اور ڈیلیوری وینوں کو 35 ہزار روپے ماہانہ سبسڈی فراہم کی جائے گی تاکہ عوامی سہولت برقرار رہے۔ یہ سبسڈی ڈیجیٹل والٹس کے ذریعے دی جائے گی اور گزشتہ روز سے نافذ العمل ہے۔

وزیرِ اعظم نے صوبائی حکومتوں کے تعاون کو سراہا اور خاص طور پر وزیر اعلی بلوچستان سرفراز بگٹی کا شکریہ ادا کیا۔ اجلاس میں بتایا گیا کہ گزشتہ تین ہفتوں میں 129 ارب روپے کا عوامی ریلیف پیکیج دیا جا چکا ہے جبکہ پیٹرول لیوی میں فی الفور 80 روپے فی لیٹر کمی کر کے عوام کو ریلیف فراہم کیا گیا۔ پاکستان ریلوے بھی 6 ارب روپے کی سبسڈی دے رہا ہے۔

اجلاس میں نائب وزیرِ اعظم، وفاقی وزراء، معاونین خصوصی اور ڈی جی انٹیلیجنس بیورو سمیت دیگر اعلی حکام نے شرکت کی۔