خیبر پختونخوا حکومت نے پیٹرول سبسڈی کے لیے احساس فیول سپورٹ اسکیم کا آغاز کر دیا

پشاور: خیبر پختونخوا حکومت نے پیٹرول پر سبسڈی فراہم کرنے کے لیے احساس فیول سپورٹ اسکیم کا باقاعدہ آغاز کر دیا ہے، جس کے تحت کم آمدنی والے افراد کو مالی معاونت فراہم کی جائے گی۔

حکام کے مطابق اس اسکیم کے تحت رجسٹرڈ موٹر سائیکل، اسکوٹر اور رکشہ مالکان کو ماہانہ دو ہزار روپے فیول سپورٹ دی جائے گی، تاکہ مہنگائی کے اثرات کو کم کیا جا سکے۔

اسکیم میں شمولیت کے لیے لازم ہے کہ گاڑی درخواست دہندہ کے اپنے نام پر رجسٹرڈ ہو اور اس کی منتقلی کا عمل مکمل ہو چکا ہو، جبکہ غیر رجسٹرڈ یا دوسرے کے نام پر موجود گاڑیاں اس سہولت کے لیے اہل نہیں ہوں گی۔

حکام نے بتایا کہ رجسٹریشن کا عمل 6 اپریل سے شروع ہوگا، جس کے بعد مستحق افراد اس سہولت سے فائدہ اٹھا سکیں گے۔

یہ اقدام ملک میں بڑھتی مہنگائی کے پیش نظر کم آمدنی والے طبقے کو ریلیف فراہم کرنے کی کوششوں کا حصہ ہے۔