مشرق وسطیٰ میں کشیدگی : پاکستان سے آج بھی 39 پروازیں منسوخ کردی گئیں

 مشرق وسطیٰ کی کشیدہ صورتحال کے باعث پاکستان سے آج بھی مجموعی طور پر 39 پروازیں منسوخ کر دی گئیں، جبکہ گزشتہ پانچ ہفتوں کے دوران منسوخ پروازوں کی تعداد تین ہزار تک جا پہنچی ہے۔

ایوی ایشن ذرائع کے مطابق کراچی سے آج جدہ، نجف، ابوظبی، بحرین، شارجہ اور دبئی کے لیے 14 پروازیں منسوخ کی گئیں۔ اسی طرح اسلام آباد سے مسقط، العین، ابوظبی، دمام اور فجیرہ جانے والی 7 پروازیں بھی منسوخ ہوئیں۔

لاہور سے دبئی، ریاض، جدہ اور ابوظبی کے لیے 8 پروازیں متاثر ہوئیں، جبکہ ملتان سے دوحہ کے لیے غیر ملکی فضائی کمپنی کی 2 پروازیں منسوخ کر دی گئیں۔

مزید برآں کراچی سے اندرون ملک ملتان، لاہور اور اسلام آباد کی 5 پروازیں بھی منسوخ ہوئیں، جبکہ اسلام آباد سے گلگت جانے والی آج کی تمام 4 پروازیں منسوخ کر دی گئیں۔

ذرائع کا کہنا ہے کہ مشرق وسطیٰ کی موجودہ صورتحال کے باعث فضائی آپریشن شدید متاثر ہو رہا ہے، جس کے نتیجے میں مسافروں کو مشکلات کا سامنا ہے۔