ملک میں بارشوں کا نیا طاقتور سسٹم داخل ہونے کو تیار، محکمہ موسمیات نے الرٹ جاری کر دیا

ملک میں پہلی بارشوں کا سلسلہ ابھی ختم نہیں ہوا کہ محکمہ موسمیات نے خبردار کیا ہے کہ ایک اور طاقتور موسمی نظام کل سے 9 اپریل تک ملک کے بیشتر علاقوں میں داخل ہوگا۔ اس دوران شدید بارشوں اور ژالہ باری کا قوی امکان ہے، جس کے باعث بالائی علاقوں میں برفباری اور لینڈ سلائیڈنگ کے خطرات کے پیش نظر الرٹ جاری کردیا گیا ہے۔

محکمہ موسمیات کے مطابق مغربی ہواؤں کا سلسلہ 5 اپریل کی شام بلوچستان کے مغربی اضلاع میں داخل ہوگا اور 9 اپریل تک بالائی علاقوں میں برقرار رہنے کا امکان ہے۔ بلوچستان کے اضلاع پنجگور، گوادر، پسنی، تربت، خضدار، قلات، کوئٹہ اور ژوب میں 5 سے 7 اپریل تک بارشیں متوقع ہیں۔ اسی دوران بارکھان، لسبیلہ، کوہلو، نصیر آباد اور گردونواح میں بھی بارش کا امکان ہے۔

پنجاب اور اسلام آباد میں 6 سے 9 اپریل کے دوران بارشیں ہونے کا امکان ہے۔ متاثرہ اضلاع میں راولپنڈی، اٹک، جہلم، چکوال، سرگودھا، میانوالی، خوشاب، فیصل آباد، لاہور، گوجرانوالہ، سیالکوٹ، نارووال اور شیخوپورہ شامل ہیں۔

سندھ کے اضلاع سکھر، لاڑکانہ، دادو، جیکب آباد اور شکارپور میں 6 اپریل کو گرج چمک کے ساتھ بارش متوقع ہے۔ گلگت بلتستان کے اضلاع استور، اسکردو، گلگت، ہنزہ، نگر اور غذر میں بارش اور پہاڑوں پر برفباری کا امکان ہے۔ آزاد کشمیر کے باغ، راولاکوٹ اور وادی نیلم میں بھی بارش اور برفباری کا خدشہ ہے۔