مارکیٹیں رات 8 بجے بند ،15دن کیلیے گاڑیوں کی رجسٹریشن مفت وزیراعلیٰ بلوچستان کا سبسڈی کا اعلان

وزیر اعلیٰ بلوچستان میر سرفراز احمد بگٹی نے صوبے بھر کے عوام کے لیے سبسڈی کا اعلان کر دیا۔کوئٹہ میں  پریس کانفرنس کرتے ہوئے سرفراز بگٹی نےکہا کہ ہمارے ہمسائے میں جنگ چل رہی ہے اس کے اثرات یہاں پڑ رہے ہیں، عوام کو سبسڈی دینے جا رہے ہیں۔

سرفراز بگٹی نے کہا کہ وزیراعظم اور آرمی چیف بہتر انداز میں پاکستان کو لے کر چل رہے ہیں جو قابل تحسین ہے، وفاقی حکومت گڈز اور پبلک ٹرانسپورٹ پر سبسڈی دے رہی ہے، 15 دن کے لئے گاڑیوں کی رجسٹریشن مفت کر رہے ہیں۔

وزیراعلیٰ بلوچستان نے کہا کہ صوبہ بھر کے کسانوں کو پٹرول، ڈیزل پر سبسڈی دیں گے، سبسڈی تھریشر مشینوں کے استعمال پر دی جائے گی، کوئٹہ اور تربت میں گرین بس سروس فری کر رہے ہیں، پٹرول پمپس کی سخت مانیٹرنگ کی جائے گی۔ مشاورت کے بعد پیر سے مارکیٹیں رات 8 بجے بند کر دی جائیں گی۔

سرفرازبگٹی نے بتایاکہ شادی ہالز اور ہوٹل 10 بجے تک کھلے رہیں گے، سکول بند کئے تو لوگ پکنک منانے نکل گئے، عوام کو سوچنا چاہیے کہ ملک سنگین بحران سے گزر رہا ہے، محکمہ خزانہ کا دفتر بند کرکے ورک فرام ہوم کیا جا رہا ہے۔

انہوں نے کہا کہ وزیراعلیٰ سیکرٹریٹ میں بھی اسٹاف کم کیا ہے، سرکاری گاڑیوں کے پٹرول پر کٹ لگایا ہے، 400 ملازمین سی ایم ہاؤس سے ایس اینڈ جی اے ڈی کو واپس کردیئے، ہم کوئی لاک ڈاؤن نہیں لگا رہے، صرف رات 8 بجے مارکیٹوں کو بند کریں گے۔

سرفراز احمد بگٹی نے کہا کہ کفایت شعاری مہم کے تحت اب تک ڈیڑھ ارب روپے کی بچت کی ہے، جو سرکاری گاڑیاں دفتری اوقات کے بعد بازاروں میں نظر آئیں ان کی ویڈیوز بناکر بھیجیں۔

وزیراعلیٰ نے کہا کہ وزیر اعلیٰ سیکرٹریٹ کی پٹرول، ڈیزل گاڑیاں نیلام کرکے الیکٹرک گاڑیاں خریدیں گے، بتدریج سوائے ایمرجنسی سروسز کے دیگر محکموں کی گاڑیوں کی جگہ الیکٹرک گاڑیاں لائیں گے۔

موجودہ صورتحال میں بھی حکومت نے پٹرول کی قلت نہیں ہونے دی۔مسافرو گڈز ٹرانسپورٹ کو سبسڈی ملنے سے عوام کو مزید ریلیف ملے گا۔۔وزیراطلاعات عطاتارڑکی مصدق ملک کے ساتھ پریس کانفرنس۔۔کہا اب حکومت کےلیے مہنگائی کابوجھ اٹھانا مشکل ہوگیاہے۔مصدق ملک نے کہاکب تک مہنگاتیل خریدکرعوام کو سستا بیچتےرہیں گے