بھارت دہشتگردی کا ڈرامہ رچانا چاہ رہا ہے، کولکتہ تک جا کر پھینٹی لگائیں گے: خواجہ آصف

وزیر دفاع خواجہ آصف نے کہا ہے کہ بھارت فالس فلیگ آپریشن کی تیاری کررہا ہے، اس بار بھارت نے کوئی ڈرامہ رچانے کی کوشش کی تو کولکتہ تک جاکر پھینٹی لگائیں گے۔ ان کا کہنا تھا پاکستان امریکا ایران مذاکرات میں اہم کردار ادا کررہا ہے، دعا کریں پاکستان سرخرو ہو۔ وزیر دفاع خواجہ آصف نے سیالکوٹ میں میڈیا سے گفتگو کرتے ہوئے کہا کہ بھارت فالس فلیگ آپریشن کے موڈ میں ہے، وہ اپنے شہری یا قید میں موجود پاکستانی کی لاشیں پھینک کر ڈرامہ رچانا چاہ رہا ہے، پاک فضائیہ نے بھارت کے اندر گھس کر اسے زک پہنچائی تھی، اس کی جو ذلت ہوئی اس پر پوری دنیا اور اس کے عوام اسے جوتے مار رہہے ہیں۔ اس بار بھارت نے کوئی حرکت کی تو کولکتہ تک جاکر پھینٹی لگائیں گے۔ خواجہ آصف نے کہا کہ امریکہ ایران مذاکرات کا عمل ایک مرحلےسے گزر رہا ہے، اس پر تبصرہ کرنا مناسب نہیں، پاکستان مذاکرات میں اہم کردار ادا کررہا ہے، دعا کریں اللہ کامیابی دے، خطے میں امن قائم ہو، تمام بردار ممالک کے اختلافات ختم ہوں۔