ذوالفقار علی بھٹو کی سیاسی خدمات کو ہمیشہ یاد رکھا جائے گا: وزیراعظم

اسلام آباد: وزیراعظم محمد شہباز شریف نے ذوالفقار علی بھٹو کی برسی پر جاری اپنے خصوصی پیغام میں کہا کہ وہ مرحوم لیڈر کی قومی، سیاسی اور آئینی خدمات کو قدر کی نگاہ سے دیکھتے ہیں۔ وزیراعظم نے خاص طور پر 1973 کے آئین کی تیاری اور منظوری میں بھٹو کے تعمیری کردار کا ذکر کرتے ہوئے اسے ملک میں پارلیمانی جمہوریت کی بنیاد قرار دیا۔

وزیراعظم نے مزید کہا کہ ذوالفقار علی بھٹو نے وزیراعظم کی حیثیت سے ملک کی ترقی، خوشحالی اور دفاعی استحکام کے لیے خلوصِ نیت سے کام کیا۔ انہوں نے عالمی سطح پر پاکستان کی بھرپور نمائندگی کی اور عوامی طرزِ حکمرانی کو فروغ دے کر عام آدمی کے مسائل حل کرنے کی کوشش کی۔ وزیراعظم نے ان کی بلندیِ درجات کے لیے دعا بھی کی۔