پٹرول بحران ہمارا پیداکردہ نہیں، حکومت ریلیف کیلئے اقدامات کر رہی: رانا ثنا اللہ

اسلام آباد: وزیراعظم کے مشیر رانا ثناء اللہ نے میڈیا سے گفتگو کرتے ہوئے کہا کہ پاکستان اس وقت ایک ایسے عالمی توانائی کے بحران کی زد میں ہے جس سے پوری دنیا متاثر ہو رہی ہے۔ انہوں نے کہا کہ ایران پر مسلط کی گئی جنگ کی وجہ سے بین الاقوامی مارکیٹ میں تیل کی قیمتیں آسمان سے باتیں کر رہی ہیں، لیکن وزیراعظم شہباز شریف کی بروقت حکمتِ عملی کی بدولت پاکستان میں تیل کی فراہمی کو یقینی بنایا گیا ہے، جبکہ دنیا کے کئی ممالک میں اس وقت پیٹرول دستیاب ہی نہیں۔

رانا ثناء اللہ نے سیاسی مخالفین کو تنقید کا نشانہ بناتے ہوئے کہا کہ کچھ عناصر اس قومی بحران کو اپنے سیاسی ایجنڈے کے لیے استعمال کر رہے ہیں اور عوام کو گمراہ کر کے احتجاج کی ہوا دے رہے ہیں۔ انہوں نے عوام سے اپیل کی کہ یہ وقت ایک دوسرے کا گریبان پکڑنے کا نہیں بلکہ ایک باوقار قوم کی طرح بحران سے نکلنے کا ہے۔ انہوں نے مزید بتایا کہ حکومت کفایت شعاری کی پالیسی پر عمل پیرا ہے اور کمزور طبقات کو ٹارگٹڈ سبسڈی (Targeted Subsidy) فراہم کی جا رہی ہے تاکہ مہنگائی کے اثرات کم کیے جا سکیں۔